تناكة الشرطة

     ليه الناس كانت بتكره الشرطة ، لأسباب كتيرة : منها على سبيل المثال تناكتهم ، ومعاملتهم للشعب على إنهم عبيد – طبعا مش كل الشرطة –

     ومسألة التناكة دى بجد شئ يضايق ... بس الحمد لله دلوقتى عرفوا يعنى أيه الشعب المصرى وعرفوا إن القوة فى إيد الشعب مش فى إيدهم  ، وعشان كده صعب إن حد فيهم يقدر يتنك

     ساعة لما قامت الثورة ، والشرطة اتهانت يوم الجمعة ، قولنا ساعتها إن هما مش هيقدروا يفتحوا بؤهم - فمهم - قدام حد تانى إلا بكل أدب واحترام ، بس اللى حصل إن فيهم ناس لسه زى ماهما ... باين عليهم عايزين درس تانى – أنا أقصد الناس اللى لسه شايفين نفسهم –

     لما كنت فى مرسى علم وراجع يوم 31يناير ، كان فى أمين شرطة من تأمين المطار اللى بيكونوا واقفين خارج المطار ، بيشوفوا اللى داخل وكده ، المهم إن أمين الشرطة دى لقيته بيقولى فى تناكة : بطاقتك ؟

بصلته واستعجبت – ده انتوا لسه واخدين درس – بعد كده ابتسمت وطلعتله البطاقة .

     برضه من حوالى كام يوم ، لقيت ضابط شرطة مرور ، واقف على جنب وماسك فى إيده كوباية شاى ، وحاطط رجله على الكرسى وبرضه بتناكة ؟

     قولت : هو اللى فيه داء مش عارف يبطله ؟ .....

     عموما لسه فيه فى الشرطة نوعيات عايزة بجد درس تانى ، وفى نوعيات محترمة جدا ، وياريت ماحدش من الشرطة يزعل منى ، إلا إذا كان من الصنف اللى أنا اتكلمت عليهم النهاردة ، لأنهم بجد لسه فى غيبوبة .

     وإن شاء الله مصر هتتقدم وهتبقى أحسن من كده .