يوم الاستفتاء المصرى

  كل استفتاء ومصر بخير 

      سمعت الجملة دى على إذاعة fm فى برنامج مواطن مصرى .

   بدأت الحرية :
       الحمد لله بدأت الحرية ، وشوفنا النهاردة اللى ماكنش كتير يقدر يصدقه قبل الثورة ، النهاردة كتير من الناس نزلوا عشان يقولوا رأيهم فى الاستفتاء ، جميع طوائف الشعب ، تقدر تقول مصر كلها نزلت عشان تقول رأيها فى التعديلات الدستورية ، وبجد شوفت أوربا النهاردة فى الاستفتاء المصرى ، كل الناس نزلت تقول رأيها ، وكل الناس واقفة طوابير فى نظام واحترام للأخر ، ومفيش تحرش ولا احتكاكات ولا مشاحنات بين الناس ، والناس كلها واقفة فى طوابير طويلة لم يصب الكثير منهم الملل منتنظرين دورهم ليدلوا برأيهم

    لماذا بدأت الحرية فعلا :
      ليه بقى الناس كانت كتيرة أوى النهاردة ، لإن بجد بقى فى حرية ، كل واحد عارف إن رأيه هيكون له دور فى البلد ، عارف إن ما بقاش فى تزوير - وسمعت من قناة الجزيرة إن واحد فى الصعيد كان بيحاول يقول رأيه مرتين والسلطات الموجودة فى لجنة الاستفتاء قبضت عليه - كمان الناس نزلت تقول رأيها عشان نفسها تشوف بلدها من أحلى البلاد فى العالم ، أو نفسه ابنه يعيش فى بلد تحافظ على كرامته وتحقق له كل حقوقه ، عشان كده كان فيه ناس كبار فى السن نزلوا عشان الاستفتاء ، أكيد عشان أولادهم وأحفادهم .

     النواقص :
     العيوب اللى كانت موجودة النهاردة ، وجود بعض الشائعات زى اللى حصل فى منطقة المرج لما واحد قال للناس الحقوا قفلوا باب الاستفتاء وفتحوه للمسيحين بس من الباب الخلفى ، بس الحمد لله الناس عشان خلاص فهمت اللعبة ما أتأثرتش بالمحاولة الفاشلة دى ، كمان برضه من العيوب إن يوم واحد بس للاستفتاء مدة صغيرة جدا ، عشان بجد مصر كلها نزلت النهاردة  إزاى 40 مليون هيقولوا رأيهم فى يوم واحد بس ، ولسه فى ناس برضه محتفظين بالعادات القديمة ، يعنى مثلا يقولك إنت هتقول لأ ولا نعم ، تقوله مثلا لأ ، يقولك لا قول نعم ، ويحاول يقنعك برأيه هو ... ياعم كل واحد له رأى وهو حر فى رأيه أمال استفتاء ازاى ؟

     المطلوب :
     عايزين بقى المرة اللى جايه يكتروا لجان الاستفتاء والانتخاب ، ويزودوا مدة الاستفتاء ، ويكون فيه نظام أكثر يعنى مثلا ممكن يخلوا الناس مجموعات مجموعات كل يوم مجموعة وممكن المجموعات دى تكون عن طريق الترتيب الأبجدى لأسماء الناس أو منطقة منطقة مثلا ، أو أى طريقة تسهل شوية عملية الاستفتاء ، وياريت يدخلوا النت فى الاستفتاء والانتخاب والناس تقدر تقول رأيها عن طريق النت ، كل ده هيقلل الزحمة كتير ، ويكون فى نظام أكتر

     وكل استفتاء ومصر أحسن .