تعريف الديكور :
بص أنا لقيت تعريف الديكور حاجة كده حسيت إن هى مكلكعة مع إن الديكور ده حاجة جميلة جدا ، عموما أنا اللى هأقدر أقوله إن الديكور ده إزاى تخلى المكان بتاعك ، سواء كان بيتك أو شغلك أو مطبخك أو حتى الحمام أيا كان هو ايه المكان ده ، المهم انك تخليه شكله جذاب وجميل والألوان متناسقة فيه ، وإن الديكور نفسه يدل على المكان يعنى مثلا ما ينفعش غرفة الضيوف يكون فيها أنوار هادية وإلا كده هتنيم الضيوف أ و إن أوضة النوم تخلي فيها ألوان فاقعة أوى وحاجات كتيرة محطوطة أمال هتنام ازاى ، مش كده وبس لأ كمان يكون فيه حرية فى الحركة فى المكان .
وزى ما قولنا إن الديكور بينفع فى أى مكان حتى ولو كان الحمام أو مكان شغلك ، برضه بينفع مهما كان حجم المكان ، صغير أو كبير .
يعنى مثلا المكان الصغير بنعمل فيه ألوان الحيطان ألوان فاتحة عشان يدينا إحساس بالوسع فى المكان زى اللون السماوى مثلا ، وممكن تعمل 3حيطان لون وحيطة لون تانى غيرهم ، والأثاث أو العفش اللى موجود فى المكان يكون ألوانه غامقة مثلا العسلى الغامق عشان يدى تناسق بين الألوان ويخلى المكان مقبول وجذاب كمان ، أما الأماكن الكبيرة فممكن ندهن الحيطة ألوان غامقة .
وبإذن الله هيكون لينا مواضيع تانية فى مجال الديكور .... تابعونا
ليست هناك تعليقات:
إرسال تعليق